"Ֆրութֆուլ Արմենիան" հայտարարում է երիտասարդ տաղանդների մրցույթ
08.05.2009
"Ֆրութֆուլ Արմենիան" հայտարարում է երիտասարդ տաղանդների նորարարական առաջարկների մրցույթ, որի գլխավոր հովանավորը "Կոնվերս բանկն է". այս մասին հայտարարվեց մայիսի 7-ին կայացած մամլո ասուլիսում:
"Ֆրութֆուլ Արմենիայի" գլխավոր գործադիր տնօրեն Անա Քրիստինա Շիրինյանը նշեց, որ մրցույթի նպատակն է` խրախուսել և նպաստել նորարական առաջարկների ներկայացմանն աշխարհի տարբեր անկյուններից երիտասարդ հայ տաղանդների բացահայտմանը: Մրցույթը հայտարարվում է գյուղատնտեսության և գյուղարդյունաբերական արտադրության, առևտրի և մարկեթինգի, ֆինանսների և ենթակառուցվածքի ոլորտներում:
"Սա հեղափոխական գաղափարների մրցույթ է լինելու և կպարգևատրվեն նրանք, ում առաջարկներն ավելի խենթ ու հետաքրքիր կլինեն: Իդեան այն է, որ երիտասարդ հայ տաղանդների մի խումբ ստեղծվի",- ասաց "Կոնվերս բանկի" գործադիր տնօրեն Արարատ Ղուկասյանը:
ՖՐՈՒԹՖՈՒԼ ԱՐՄԵՆԻԱ ՄՐՑՈՒՅԹԻՆ կարող են մասնակցել 18-ից 30 տարեկան անգլերեն և հայերեն լեզուների իմացությամբ, Հայաստանի Հանրապետությունում ծնված կամ Հայկական համայնքի հետ արյունակցական կապեր ունեցող և ՄՐՑՈՒՅԹԻՆ մասնակցել ցանկացող բոլոր հայ երիտասարդները: Մասնակցությունն անվճար է բոլոր մասնակիցների համար:
"Ֆրութֆուլ Արմենիայում", "Կոնվերս բանկ" ՓԲԸ-ում, "Տիեռաս դե Արմենիա" ՓԲԸ-ում, "Արմենիա միջազգային օդանավակայաններ" ՓԲԸ-ում, "Էյ Դի Էֆ Շոփս" ՓԲԸ-ում ուղղակիորեն կամ անուղղակիորեն աշխատող, ինչպես նաև նրանց հետ այս կամ այն կերպ կապակցված ընկերություններում աշխատող անձանց մասնակցությունը մրցույթին արգելվում է:
ՖՐՈՒԹՖՈՒԼ ԱՐՄԵՆԻԱ ՄՐՑՈՒՅԹՈւՄ նախատեսված է 21 մրցանակ: Կսահմանվի Ֆրութֆուլ Արմենիա Ոսկե Մրցանակ, որի հաղթողը կպարգևատրվի 3.000.000 ՀՀ դրամով: