«Կոնվերս» վերապատրաստման կենտրոնն իր դռները բացեց առաջին ուսանողների համար
27.10.2015
Հոկտեմբերի 23-ին «Կոնվերս» վերապատրաստման կենտրոնն իր դռները բացեց երիտասարդների համար: Առաջին դասը վարեց Կոնվերս Բանկի Գործադիր տնօրեն Տիգրան Դավթյանը:
«Երիտասարդները ցանկացած երկրի հիմնական ուժն են և ապագան, հասարակության առավել դինամիկ, բայց միևնույն ժամանակ առավել խոցելի մասը: Պետք է խրախուսել և աջակցել, ստեղծել բարենպաստ պայմաններ երիտասարդների առաջընթացի համար` կյանքում և կարիերայում», - ասաց Տիգրան Դավթյանը:
«Կոնվերս» վերապատրաստման կենտրոնը հնարավորություն է ընձեռնում ցանկացողներին ստանալ գիտելիքներ և գործնական հմտություններ ֆինանսաբանկային ոլորտում: Դասընթացներին կարող են մասնակցել ԲՈՒՀ-երի ավարտական կուրսերի ուսանողները, բանկային ոլորտում աշխատող մասնագետներն, ինչպես նաև բոլոր նրանք, ովքեր ցանկանում են ձեռք բերել նոր մասնագիտություն:
«Մենք համոզված ենք, որ ֆինանսաբանկային ոլորտում հմուտ ու կրթված կադրերի առկայությունը կհանգեցնի ոչ միայն նշված ոլորտի, այլ նաև Հայաստանի ողջ տնտեսության վերելքի», - ավելացրեց Տիգրան Դավթյանը:
Կենտրոնի դասընթացները վարում են Բանկի պրոֆեսիոնալ և փորձառու աշխատակիցները:
Դասընթացների ավարտին մասնակիցները կստանան հավաստագրեր: Լավագույն արդյունքները ցուցաբերած ուսանողներն անմիջապես կհամալրեն Կոնվերս Բանկի թափուր աշխատատեղերը կամ կընդգրկվեն կադրային ռեզերվում: